Во рамки на серијалот „Секојдневни Хероини“ правиме интервјуа на жени кои секој ден прават по некој успех, без да се фалат со тоа. Жени што се справуваат со различни предизвици стоејќи и секојдневно се борат. Жени кои имаат огромно животно искуство кое споделено со други ќе придонесе за зајакнување на позициите на жените воопшто. Денес разговараме со Јехона Бела -генерална менаџерка на Институте Лаб.

Еднакви.мк: Кој момент го сметате како пресвртница во својот живот, односно Ви оставил најголемо влијание во животот?

Јехона Бела: Пресвртница во мојот живот беше моментот кога ја добив можноста да го водам Institute Lab. Тоа беше огромен предизвик, но и потврда дека мојата амбиција, посветеност и знаење се доволни за да управувам со нешто толку значајно. Тој момент ме научи дека успехот доаѓа кога се осмелуваме да прифатиме одговорност и да веруваме во себе.

Еднакви.мк: Што мислите дека им е потребно на жените во Македонија?

Јехона Бела: На жените во Македонија им е потребна поголема поддршка – како од општеството, така и од институциите. Потребни се повеќе можности за образование, развој на кариерата и финансиска независност. Исто така, многу е важно да се создаде средина каде младите девојки ќе бидат охрабрени да преземаат лидерски улоги без страв од осуда.

Еднакви.мк: Кој е најважниот совет што некогаш сте го дале некому?

Јехона Бела: „Никогаш не чекај совршен момент – создади го самата.“ Успехот не доаѓа преку ноќ, но секој мал чекор кон целта е вреден. Самодовербата и истрајноста се клучни.

Еднакви.мк: Што би им препорачале на одлучувачите да направат за жените во Македонија?

Јехона Бела: Би препорачала да се вложува повеќе во едукација и претприемништво за жени. Потребни се програми што ќе им помогнат на младите девојки да стекнат вештини и ресурси за да основаат сопствени бизниси или да напредуваат во професионалниот свет. Покрај тоа, важно е да се промени перцепцијата дека одредени професии или лидерски позиции не се за жени.

Еднакви.мк: Доколку можете да промените три работи, кои би биле тие?

Јехона Бела:

1. Стереотипите за младите жени во бизнисот. Често ме потценуваат поради возраста, но успехот не зависи од годините, туку од знаењето и посветеноста.
2. Пристапот до ресурси за жените претприемачи. Многу талентирани жени не добиваат шанса да реализираат идеи поради недостаток на финансиска и институционална поддршка.
3. Менталитетот за преземање ризик. Би сакала повеќе жени да се охрабрат да преземаат иницијатива, без страв од неуспех.

Еднакви.мк: Што би им препорачале на младите жени кои се сеуште несигурни во себе?

Јехона Бела: Верувајте во себе и не се плашете да барате можности! Несигурноста е нормален дел од патот, но секоја грешка е лекција. Опкружете се со луѓе што ве поддржуваат и секој ден правете по еден чекор кон својата цел. Вашиот глас и вашите идеи вредат!